Dawid með fullt hús á æfingu

Dawid Kolka sigraði á barna- og unglingaæfingu hjá Skákfélaginu GM Helli sem fram fór 11. nóvember sl. Dawid fékk 5v í jafn mörgum skákum eða fullt hús vinninga. Annar var Mikhael Kravchuk með 4v. Margir voru svo með 3v en þeirra fremstur á stigum var Heimir Páll Ragnarsson sem fékk 3v og 14 stig.

Að þessu sinni tóku þátt í æfingunni: Dawid Kolka, Mikhael Kravchuk, Heimir Páll Ragnarsson, Birgir Ívarsson, Óskar Víkingur Davíðsson, Halldór Atli Kristjánsson, Egill Úlfarsson, Róbert Luu, Brynjar Haraldsson, Ívar Andri Hannesson og Óttar Örn Bergmann Sigfússon.

Dæma- og verkefnatíma fyrir félagsmenn hafa verið undanfarið á laugardögum og má segja að fyrstu umferð sé lokið og önnur umferð sé að fara að hefjast. Þessir verkefnatímar hafa gengið vel en hóparnir hafa komist mislangt. Aðalega hefur verið farið í peðsendatöfl og taktískar æfingar.

Næsta æfing verður haldin mánudaginn 17. nóvember og hefst kl. 17:15, en hún verður einungis fyrir félagsmenn í Skákfélaginu GM Helli þar sem unnið verður í verkefnahópum að mismunandi æfingum ásamt því að tefla. Æfingarnar eru haldnar í Álfabakka 14a í Mjóddinni, gengið inn á milli Subway og Föken Júlíu og salurinn er á þriðju hæð.