1.2.2008 | 21:39

Góð stemming á Hellismóti

Hér a heimasíðu Hellis er áætlunin að fjalla um mótið á öðrum nótum en á öðrum skákmiðlum. Ekki bein upptalning á úrslitum. Þau má finna á Skák.is og á Chess-Results. Hér verður meira sagt frá gangi mála en hlekki á þær slóðir sem segja frá úrslitum má finna á vinstri hluta síðunnar undir "tenglar".

Alls taka 28 skákmenn þátt í mótinu. Í upphafi var markmiðið sett á 30 skákmenn og um tíma leit það ekki of vel út. En eins og svo oft áður tóku skákmenn við sér á síðustu stundu. Flestir sterkustu skákmenn landsins sem hafa aldur til taka þátt. Þó vantar einstaka skákmenn og má þar nefna Hjörvar Stein, Ingvar Ásbjörnsson og Lauglækinga en Daði Ómarsson er eini fulltrúi þeirra.

Ánægjulegt er að sjá að skákmenn koma víða. Tveir skákmenn koma frá Akureyri, einn frá Borgarnesi og Eyjum en um tíma stóð til að tveir skákmenn kæmu frá báðum stöðum.

Kópavogsbúar eru fjölmennir en Hellir hefur ávallt verið öflugur í Kópavogi og svo eru skákmenn frá Hafnarfirði og Seltjarnarnesi. Enginn Garðbæingur er með.

Hellismenn eru langfjölmennastir en af 18 Íslendingum er tíu úr Helli, tveir frá TR og SA og einn frá UMSB, Fjölni, TV og Haukum.

Af hinum erlendu keppendum eru 5 Danir, 3 Svíar og 1 Þjóðverji og 1 Skoti. Erlendu skákmennirnir eru almennt stighærri en þeir innlendu.

Mótið hófst í morgun að nýr formaður ÍTR, Bolli Thoroddsen, setti mótið og lék fyrsta leikinn fyrir Sverri Þorgeirsson gegn Degi Andra en skákinni lauk með jafntefli.

Skákmennirnir sem koma að utan lenda hér í skítakulda allan tímann og trúa því sjálfsagt ekki að slíkur kuldi sé óvenjulegur á Ísland. Í morgun talaði ég t.d. við Suður-Afríkumann niður í vinnu og sagði við hann að þessu kuldi væri ekki venjulegur hérlendis. Hann horfði á mig aumkunarverðum augum og sagði "I guess that you say this to everyone"!

Á skákstað vakti Vigfús yfir keppendum en skakstjórnin í dag var í hans höndum Edda og Hjördís hafa séð um veitingar ásamt Vigfúsi og í dag voru þvílíkar hnallþórur í boði sem fallið hafa í sérdeilis góðan farveg.

Af skákunum sjálfum má benda á góðan sigur Geirþrúðar Önnu í fyrstu umferð gegn sterkum Dana. Virkilega vel tefld skák hjá Geirþrúði sem vert er að skoða.

Eyjólfur sér um innsláttur skáka og sjálfur hef ég séð um myndatökur.

Læt þetta duga í dag en hvet menn til að koma á skákstað og fylgjast með ungdómnum að tafli. Það er hvort sem er ekkert veður til að vera úti við!

Gunnar Björnsson

Taflfélagið Hellir

Spil og leikir | Slóð | Facebook | Athugasemdir (0)

1.2.2008 | 17:36

Óvænt úrslit í fyrstu umferð unglingamóts Hellis

Það urðu óvænt úrslit í fyrstu umferð alþjóðlega unlingamóts Taflfélagsins Hellis sem hófst í morgun í húsakynnum Skákskólans. Geirþrúður Anna Guðmundsdóttir (1520) sigraði Danann Björn Möller Oschner (1920), Dagur Andri Friðgeirsson (1798) gerði jafntefli við Sverri Þorgeirsson (2120), Tinna Kristín Finnbogadóttir (1658) gerði jafntefli við Danann Kristian Seegert (2052). Önnur umferð hófst kl. 17 og eru áhorfendur sérstaklega boðnir velkomnir að koma að sjá skákmenn framtíðirnar að tafli.

Úrslit. 1. umferðar:


Thorgeirsson Sverrir	ISL	½ - ½	Fridgeirsson Dagur Andri	ISL
Magnusson Patrekur Maron	ISL	0 - 1	Hanninger Simon	SWE
Wickstrom Lucas	SWE	1 - 0	Brynjarsson Eirikur Orn	ISL
Mcclement Andrew	SCO	0 - 1	Berchtenbreiter Maximilian	GER
Seegert Kristian	DEN	½ - ½	Finnbogadottir Tinna Kristin	ISL
Johannsdottir Johanna Bjorg	ISL	0 - 1	Omarsson Dadi	ISL
Storgaard Morten	DEN	1 - 0	Baldursson Gestur Vagn	ISL
Sverrisson Nokkvi	ISL	0 - 1	Hansen Mads	DEN
Ochsner Bjorn Moller	DEN	0 - 1	Gudmundsdottir Geirthrudur Anna	ISL
Karlsson Mikael Jóhann	ISL	½ - ½	Brynjarsson Helgi	ISL
Aperia Jakob	SWE	1 - 0	Lee Guðmundur Kristinn	ISL
Andrason Pall	ISL	½ - ½	Frigge Paul Joseph	ISL
Kristinsson Bjarni Jens	ISL	1 - 0	Kjartansson Dagur	ISL
Akdag Dara	DEN	1	bye

Taflfélagið Hellir

Spil og leikir | Breytt s.d. kl. 17:45 | Slóð | Facebook | Athugasemdir (0)

1.2.2008 | 11:58

Alþjóðlegt unglingamót Hellis hafið!

Alþjóðlegt unglingamót Hellis hófst í morgun í húsnæði Skákskóla Íslands, Faxafeni 12. Alls taka 27 unglingar þátt frá fimm löndum og víð vegar frá landinu! Bolli Thoroddsen, nýr formaður ÍTR, setti mótið og lék fyrsta leikinn í skák Sverris Þorgeirssonar og Dags Andra Friðgeirssonar.

Þetta er stærsta alþjóðlega unglingaskákmót sem haldið hefur verið hérlendis.

Reykjavíkurborg er aðalstyrktaraðili mótsins en einnig styrkja Kópavogsbær og Skáksamband Íslands við mótshaldið og kunnum við þessum aðilum bestu þakkir fyrir.