Fjör í Feninu

Þegar þetta er ritað er þriðja umferð alþjóðlega mótsins í fullum gangi og reyndar einnig þriðja umferð helgarmóts TR og Hellis. 

Sigurður Daða vann Atla Freyr, Lazarev vann Omar og Hjörvar vann Heikki.  Enn sitja að tafli Björn og Róbert sem og Magnús og Miziuga.  Þeir fyrrnefndur virðast hafa vinningsmöguleikanna sín megin.

Í gær spjölluðum við Rúnar Berg við Heikki.  Sá hefur það gott á Íslandi, hefur aldrei áður verið hér að sumarlagi.  Hann labbar á söfn og skoðar sig um á daginn.    Hann hefur teflt á 19 ólympíuskákum, því fyrsta í Varna í Búlgaríu árið 1962 og nú síðast í Tórínó 2006.   Hann teflir ekki á næsta ólympíumóti, kemst væntanlega ekki í finnska liðið.  Aðeins Portisch hefur teflt oftar á ólympíumóti eða 20 sinnum.    Hann náði aldrei að tefla við Fischer en vann Spassky árið 1974 en þá var Spassky væntanlega þriðji sterkasti skákmaður heims á eftir Fischer og Karpov.  

Því lífgar óneitanlega upp á mótið hér að fá helgarskákmót í næsta sal.  Þar tefla 18 skákmenn og eftir 3 umferðir eru fjórir keppendur með fullt hús.  Það er þeir Davíð Kjartansson, Torfi Leósson, Matthías Pétursson og Halldór Brynjar Halldórsson.  Hart barist!

Skora á skákmenn að kíkja við á morgun.  Greg Norman who?

Óstöðvandi Pólverji?

Pólverjinn Misiuga hefur komið sterkur inn það sem af er mótinu.  Í dag hafði hann Hjörvar Stein í spennandi skák þar.  Róbert vann Westerinen nokkuð örugglega og Magnús Örn vann Atla Frey í fórnarskák þar sem Atli fórnaði en Magnús varðist og hafði betur.

Tvö stutt jafntefli urðu.  Hjá Lazarev og Birni annarsvegar og Omari og Daða hinsvegar.  

Pólverjinn er efstur með 2 vinninga.  Lazarev og Björn hafa 1,5 vinning en aðrir minna.  Það stefnir greinilega í hörkubaráttu!  

Skákirnar eru komnar á vefsíðu mótsins og reyndar á Skákhornið.  Á morgun hefst helgarskákmót TR og Hellis í feninu og eftir slaka skráningu til að byrja með hefur hún tekið kipp og eru nú 15 skákmenn skráðir enda miklu meira vit í því að tefla á sumrin en að spila golf eða fótbolta!  Skora á skákara að fjölmenna!

Á morgun fer fram þriðja umferð og hefst kl. 17:30.  Þá mætast m.a.  Magnús-Misiuga, Lazarev-Omar og Róbert-Björn.