Dawid Kolka í þriðja sæti á Norðurlandamótinu í skólaskák

Tveir ungir Hellismenn tóku þátt í D-flokki á Norðurlandamótinu í skólaskák um síðustu helgi. Það voru þeir Dawid Kolka og Hilmir Freyr Heimisson sem stóðu sig með ágætum en Dawid lenti í þriðja sæti með 4v og Hilmir Freyr í fjórða sæti með 3,5v. D-flokkurinn sem var fyrir þá sem fæddir voru 2000 og 2001 var vel skipaður en fyrir mótið voru okkar menn í 6. og 7. sæti í stigröðinni þannig að það var vel gert hjá þeim að verða í 3. og 4. sæti. Hilmir Freyr á svo eitt ár eftir í flokknum og getur því bætt um betur á næsta ári.

Íslensku krakkarnir fengu flesta vinninga samtals á Norðurlandamótinu 36,5, eftir hörkuspennandi keppni við Dani, sem fengu vinningi minna. Það voru hinir ungu og bráðefnilegu Hilmir Freyr Heimisson og Nökkvi Sverrisson sem tryggðu íslenskan sigur í blálokin. Mikið er jafnan lagt upp úr sigri í   ,,Landakeppninni" en Norðurlandamótið í skólaskák var fyrst haldið 1980, og á því langa og merka sögu.