Lenka og Bragi efst!

Gunnar Björnsson skrifar: 

Lenka Ptácníková og Bragi Þorfinnsson er efst á Fiskmarkaðsmóti Hellis með 3,5 vinning að lokinni fjórðu umferð, sem var að klárast.  Lenka gerði örjafntefli við eiginmann sinn, Omar Salama, en Bragi sigraði Spánverjann Fonseca. 

Hjörvar Steinn Grétarsson, mætti vopnaður Man. Utd.-treyju og það dugði vel, því hann sigraði "mentorinn" Ingvar Þór Jóhannesson og er í 3.-5. sæti, með 2,5 vinning, ásamt Egyptanum Walaa Sarwat, sem hélt jafntefli á móti Birni Þorfinnssyni og Pólverjanum Andrezj Misiuga, sem vann nú Sævar Bjarnason, og ætti greinilega að leggja fyrir meira en bankastörf, svo vitnað sé í grein Helga Ólafsson í Morgunblaðinu í morgun! Misiuga er reyndar ekki bankastarfsmaður!

Annars má nálgast úrslit, stöðu, stigaútreikninga o.þ.h. á vinstri hluta síðunnar, undir "tenglar".   

Fimmta umferð hefst kl. 17 og ljóst að Sarwat og Bjössi fá litla hvíld en skák þeirra er nýlokið.  Í umferðinni mætast m.a. Bragi-Misiuga, Lenka-Björn og Sævar-Hjörvar.

Enn bólar ekkert á vöfflunum hans Björns.  Eru loforð Björns alveg innantóm framsóknarloforð:  Árangur enginn, algjört stopp?