Bragi með vinnings forskot eftir jafntefli gegn Hjörvari

Alþjóðlegi meistarinn Bragi Þorfinnsson hélt jafntefli gegn Hjörvari Steini Grétarssyni í sjöttu umferð Fiskmarkaðsmótsins, sem fram fór í dag.   Bragi leiðir og hefur 5 vinninga.  Í 2.-3. sæti eru Björn bróðir hans, sem sigraði Spánverjann Fonseca í hörkuskák, þar sem Spánverjinn fórnaði manni, og egypski alþjóðlegi meistarinn Walaa Sarwat sem gerði jafntefli við Pólverjann Misiuga í 120 leikja skák!

Misiuga virtist lengi vel ætla að hafa Egyptann og var lengi peði yfir.  Hann virðist svo hafa leikið af sér manni í biskupaendatafli en var seigur og hélt jafntefli. 

Ingvar Þór Jóhannesson tefldi "flóðhestinn" gegn Lenku en staðan sprakk út á réttum tíma og Ingvar vann góðan sigur.

Omar og Sævar gerðu stutt jafntefli.

Sjöunda umferð fer fram á morgun og hefst kl. 17.  Þá mætast m.a. Bragi-Omar, Ingvar-Björn og Sarwat-Hjörvar.  Björn hefur ennþá von um áfanga að alþjóðlegum meistaratitli en til þess þarf hann að vinna allar skákirnar sem eftir eru.

Hjörvar hefur staðið sig best stigalega það sem af er mótið, en hefur 24 stig í plús, Misiuga kemur næstur með 17 stig og Bragi þriðji með 9 stig.

Úrslit, stöðu og stigaútreikninga má finna til vinstri, undir tenglar.