Bragi í forystu!

Bragi Þorfinnsson sigraði Lenku Ptácníkovu í áttundu og næstsíðustu umferð Fiskmarkaðsmóti Hellis og er einn efstur með 6 vinninga því helsti andstæðingur hans egypski alþjóðlegi meistarinn gerði jafntefli við landa sinn Omar Salama og er annar með 5,5 vinning.  Í 3.-4. sæti eru Björn Þorfinnsson sem sigraði "okkar mann í TR" og Ingvar Þór Jóhannesson sem lagði Sævar Bjarnason.  Ingvar hefur unnið fjórar skákir í röð!

Hinn ungi og efnilegi Hjörvar Steinn Grétarsson, sem sigraði Spánverjann Fonseca, og Lenka eru í 5.-6. sæti með 4,5 vinning.

Hörkuumferð verður á morgun en þá mætast m.a Bragi-Ingvar, Sarwat-Lenka og Sævar-Björn.  Hjörvar teflir við Misiuga.  

Athyglisvert er að skoða tölfræði frá mótinu.  Hjörvar hefur hækkað um heil 27 stig og Misiuga um 20 stig.  Þessir tveir skera sig nokkuð úr.  Omar er næstur með 7 stig.  Mikil barátta hefur verið á mótinu og hafa aðeins 3 stutt jafntefli átt sér stað.  Í einu tilfelli voru það bræður, í öðru hjón og það þriðja í skák Omars og Sævars.

Aðeins 11 skákum af 40 hefur lokið með jafntefli.  Af þeim 29 sem hafa unnið hafa 16 unnist á hvítt og 13 á svart!  Vinningshlutfall hvíts er því 54%.