Pistill 5. umferðar

 

Fyrsta skákin kláraðist hjá undirrituðum á 6 borði. Upp kom teóría sem undirritaður þekkti lítið en andstæðingurinn kunni upp á sína tíu fingur. Niðurstaðan var ónákvæmni hjá undirrituðum og loks afleikur sem leiddi til taps.

 

Næsta skák kláraðist á 2 borði hjá Birni Þorfinnssyni. Upp kom mjög flókin og vandasöm staða þar sem andstæðingurinn fórnaði manni fyrir sókn og frelsingja. Birni tókst ekki að finna réttu leikina og tapaði.

 

Þriðja skákin sem lauk var á fyrsta borði. Stefán Kristjánsson var með svart og tefldi Grunfeld vörn. Skákin var flókin og á einum stað í skákinni ætlaði andstæðingur Stefáns að ná af honum manni en Stefán fann ráð við því og var samið um jafntefli stuttu síðar.

 

Næst lauk skák Sigurðar Daða á 5 borði. Sigurður Daði náði fljótt að jafna taflið og fá örlítið betra með svörtu. Andstæðingnum tókst þó að lauma inn smá trikki, og fékk að lokum frelsingja á a-línunni sem ekki varð stöðvaður.

 

Á þriðja borði fékk Sigurbjörn góða stöðu með svörtu, en þó brothætta. Tókst andstæðingnum með góðum tilburðum að sækja að Sigurbirni svo að lokum þurfti hann að láta drottninguna af hendi og stuttu síðar skákina.

 

Að lokum var mikil baráttuskák á 4 borði. Ingvar Þór lék snemma af sér peði en barðist með kjafti og klóm og náði að ná ágætis mótsspili. Að lokum vann hann svo peðið til baka. Í tímahraki fórnaði hann síðan drottningu fyrir biskup og hrók. Í lokin hafði hann hrók og biskup gegn drottningu og peði. Hugsanlega var sú staða unnin hjá andstæðingi hans en sama staðan kom upp þrisvar og því lauk skákinni jafntefli.

 

Niðurstaðan var því 1 vinningur gegn georgísku sveitinni. Verða að þetta að teljast vonbrigði en þá er bara að bíta í skjaldarrendurnar og berjast vel á morgun, í 6 og næst síðustu umferð.