Keppendur á KB banka mótinu

{mosimage} John Shaw (2439), sem er 37 ára hagfræðingur og næst elstur keppenda, hefur náð tveimur áföngum að stórmeistaratitli og vantar aðeins einn áfanga til að fá útnefninguna eftirsóttu. Þegar ein umferð er eftir af Bretlandsmóti taflfélaga þá vantar skoska meistaranum aðeins eitt jafntefli upp á að tryggja sér áfanga og þar með titilinn.  John hefur skrifað fjölda skákbóka og nýtur virðingar sem slíkur. Shaw verður að teljast sigurstranglegastur keppenda og annað myndi koma talsvert á óvart.

{mosimage} Graeme Buckley (2398) er 34 ára enskur alþjóðlegur meistari. Graeme hefur lítið teflt undanfarin ár og verður fróðlegt að fylgjast með hvernig honum reiðir af í mótinu. Hans helstu afrek eru áfangi að stórmeistaratitli á hinu þekkta Hastings-móti fyrir um áratug síðan og fyrsta sæti á  Samveldamótinu mótinu árið 2001.  Hann vann Adams árið 1990 og náði einu sinni því afreki að vinna sjö kappskákir í röð árið 1993, þ.e. 3 síðustu skákirnar í Hastings og fjórar fyrstu í Cannes.  Reyndar gekk ekkert sérstaklega vel á hvorugu mótinu!  Buckley hefur rétt eins og Shaw verið duglegur að skrifa skákbækur.  Graeme er næststigahæstur keppenda og verður að teljast líklegur til að berjast um efstu sætin á mótinu.

{mosimage} Merjin van Delft (2372) er 26 ára alþjóðlegur meistari frá Hollandi.  Merjin varð snemma efnilegustu skákmönnum Hollands og varð m.a. hollenskur meistari 16 ára og yngri árið 1995 og annar á hollenska meistaramótinu fyrir 20 ára og yngri árið 1998.  Merjin varð hraðskákmeistari Amsterdam árið 2002 sem verður að teljast gott afrek.  Árið 2003 náði Merjin þremur áföngum að alþjóðlegum meistaratitli og tryggði sér þar með titilinn en hefur ekki enn náð áfanga að stórmeistaratitli. Það verður fróðlegt að sjá hvernig honum gengur í baráttunni við íslensku keppendurna.   

{mosimage} Sigurbjörn Björnsson (2335) er þrítugur FIDE-meistari og félagsmaður í Helli.  Sigurbjörn, sem er stigahæstur innlendra keppenda, hefur bæði verið sigursæll á mótum hérlendis og í Kaupmannahöfn.  Tvö ár í röð hefur Sigurbjörn verið meðal efstu manna í Politiken Cup í Kaupmannahöfn árin 2004 þegar hann hafnaði í 4.-13. sæti og 2005 þegar hann hafnaði í 2.-13. sæti.  Sigurbjörn fékk 5 vinninga af 7 mögulegum með Helli á EM taflfélaga árið 2003 og var hársbreidd frá AM-áfanga.  Sigurbjörn hefur tvívegis orðið efstur á Skákþingi Reykjavíkur 2001 og 2003, en fékk í hvorugt skiptið titilinn þar sem hann er stoltur Hafnfirðingur!  Sigurbjörn er að sjálfsögðu margfaldur skákmeistari Hafnarfjarðar.  Sigurbjörn sigraði á Meistaramóti Hellis árin 1998 og 1999 en varð í hvorugt skiptið skákmeistari félagsins enda þá í öðru taflfélagi. Virðist þetta vera eins og rauður þráður í gegnum skákferil Sigurbjarnar, að vinna mótin en án vegtylla! Sigurbjörn varð hraðskákmeistari Hellis 2004 og var þá loksins kominn í félagið!  Einnig varð hann Íslands- og Norðurlandameistari með Helli árið 2005.  Það er lyginni líkast að þessi sterki skákmaður hafi ekki enn krækt í áfanga að alþjóðlegum meistaratitli og er það vafalaust von skákáhugamanna að það takist loks í KB bankamótinu 2006.

{mosimage} Björn Þorfinnsson (2311) er 26 ára FIDE-meistari og félagsmaður í Helli. Hann er starfsmaður KB banka og því góður fulltrúi styrktaraðila!  Björn hefur verið afar sigursæll á skákmótum Hellis og er sigursælasti skákmaðurinn í sögu félagsins.  Björn er sexfaldur skákmeistari Hellis hampaði titlinum 1997-1999 og 2002-2004 og auk þess að verða atskákmeistari félagsins 2002 og hraðskákmeistari 2002 og 2003.  Björn varð skákmeistari Reykjavíkur 2003 á einu sterkasta Skákþingi sem haldið hefur verið sem er vafalítið hans besti árangur.  Björn hefur náð tveimur áföngum að alþjóðlegum meistaratitli báðum árin 2004, þ.e. með góðri frammistöðu með Helli á EM taflfélaga og á Ístaksmótinu.  Björn lék lykilhlutverk í liði Íslands sem varð ólympíumeistari 16 ára og yngri 1995, fékk 5,5 vinninga af 7 á fjóra borði.  Björn er margfaldur Íslands- og Norðurlandameistari í skólaskák á yngri árum og með taflélaginu Helli á efri árum!  Markmið Björns í mótinu er klárlega að ná þriðja og síðasta áfanganum að alþjóðlegum meistaratitli.

{mosimage} Sigurður Daði Sigfússon (2309) er 34 ára FIDE-meistari og félagsmaður í Helli.  Sigurður Daði hefur oftsinnis góðum árangri hérlendis og varð t.d. skákmeistari Reykjavíkur árið 1989 þá aðeins 17 ára og skákmeistari Taflfélags Reykjavíkur 1992.  Sigurður Daði varð skákmeistari og hraðskákmeistari Hellis 2005 og atskákmeistari Hellis 2003.  Sigurður Daði var mjög nálægt áfanga á EM árið 2004 þegar hann fékk 5 vinninga í 7 skákum.  Sigurður Daði varð Íslandsmeistari með Helli árið 2005 og stefnir ótrauður á sinn fyrsta AM-áfanga í mótinu.

{mosimage} Ingvar Þór Jóhannesson (2269) er 28 ára FIDE-meistari og félagsmaður í Helli.  Ingvar náði þriðja sæti á Íslandsmótinu í skák árið 2003 og hafnaði í 2.-3. sæti á Ístaksmótinu 2004 þar sem hann náði sér í áfanga að alþjóðlegum meistaratitli.  Ingvar varð Íslands- og Norðurlandameistari með Helli árin 2005 en jafnframt varð hann Íslandsmeistari með Hróknum 2003 og 2004.  Ingvar er vel lesinn og skipulagður skákmaður sem getur verið skeinuhættur hvaða skákmanni sem er.

{mosimage} Omar Salama (2214) er 25 ára Egypti og félagsmaður í Helli.  Omar sem er nýfluttur til landsins og nýgifur Lenku Ptácníkovu, eina kvennstórmeistara landsins,  hefur komið sem stormsveipur inn í íslenskt skáklíf.  Hann var vart lentur á landinu áður en hann varð hraðskákmeistari Reykjavíkur og skömmu síðar varð hann svo skákmeistari Hellis. Með því afreki varð Omar væntanlega fyrsti erlendi ríkisborgarinn  sem verður skákmeistari íslensks taflfélags. En Omar hefur ekki bara staðið vel á Íslandi.  Hann náði bestum árangri á fyrsta borði með egypska landsliðinu, 26 ára yngri, í keppni landsliða íArabaþjóða 2005.  Omar hefur líka unnið við þjálfun og þjálfaði bæði egyska keppendur á meistaramóti Araba 2005 þar sem Egyptum gekk vel og höfnuðu í 1. og 3. sæti.  Hingað til hefur Egyptinn knái staðið sig feykilega vel í Hellisheimilinu og verður áhugavert að sjá hvort gengið haldi áfram að vera gott.

{mosimage} Bragi Halldórsson (2211) er félagsmaður í Helli og er aldursforseti mótsins, 57 ára.  Bragi er sá keppandi sem lengst hefur verið í félaginu og hafa fáir teflt fleiri skákir með félaginu en þessi trausti félagsmaður. Bragi hefur verið iðinn við skákskrif og hefur bæði skrifað í Tímann og Þjóðviljann auk skákbókaþýðinga.  Bragi varð Íslandsmeistari með Helli 1999 og 2000 en auk þess varð Bragi Íslandsmeistari með Taflfélagi Reykjavíkur 1974 og með Mjölni 1975 en það var áður en flestir andstæðinga Braga á mótinu voru fæddir!  Hann varð skákmeistari Mjölnis árið 1978.  Bragi var nálægt því að ná áfanga að alþjóðlegum áfanga að alþjóðlega Hellismótinu 1997 og færi vel á því að hann kláraði verkið KB mótinu 2006.

{mosimage} Hjörvar Steinn Grétarsson (2087) er 12 ára félagsmaður í Helli og langyngstur keppenda. meira en tvöfalt yngri en sá næstyngsti!  Þessi má geta að hann var ekki fæddur þegar félagið var stofnað 1991! Hjörvar byrjaði ungur að tefla og mætti á sínu fyrsta æfingu í Helli haustið 2000.  Hann vakti strax mikla athygli fyrir góðan árangur.  Hjörvar varð norðurlandameistari í skólaskák árin 2004 og 2006 auk þess sem hann varð norðurlandameistari með Rimaskóla 2004.  Hjörvar komst í sögubækurnar í fyrra þegar hann  tryggði sér þátttökurétt í landsliðsflokki með góðum árangri í áskorendaflokki Skákþings Íslands.  Hjörvar sló þar með 20 ára met Þrastar Árnasonar og Hannesar Hlífar Stefánssonar, sem voru á 14 ári þegar þeir tefldu í landsliðsflokki árið 1986!  Hjörvar tefldi í Reykjavíkurskákmótinu og náði þar góðum árangri fékk 4,5 vinning í 9 skákum og tefldi undantekningarlaust við sér stigahærri menn.  Hjörvar er þrefaldur Íslandsmeistari með Helli í unglingaflokki.  Það verður fróðlegt að fylgjast með framgangi þessa efnilega pilts í mótinu.