Atskákmót Reykjavíkur og Atskákmót GM Hellis, suðursvæði, mánudaginn 11. nóvember

Atskákmót Reykjavíkur sem jafnframt er atskákmót GM Hellis, suðursvæði fer fram mánudaginn 11. nóvember.  Mótið fer fram í félagsheimili GM Hellis, Álfabakka 14a í Mjódd. Tefldar verða 6 umferðir með Svissnesku-kerfi og hefur hvor keppandi 15 mínútur á skák. Mótið hefst kl. 19:30.

Verði tveir jafnir í baráttunni um annanhvorn titilinn verður teflt tveggja skáka hraðskákeinvígi. Verði jafnt að því loknu verður tefldur hraðskákbráðabani. Verði fleiri en tveir jafnir verður tefld einföld umferð, hraðskák. Verði enn jafnt, þá bráðabani.  

Núverandi atskákmeistari Reykjavíkur er Arnar Gunnarsson og atskákmeistari Hellis er Vigfús Ó. Vigfússon.

Verðlaun:

1. 15.000

2. 7.500 

3. 4.000

 Þátttökugjöld:

16 ára og eldri: 1000 kr

15 ára og yngri: 500

Elsa María sigraði á hraðkvöldi

Elsa María Kristínardóttir sigraði örugglega með fullu húsi á hraðkvöldi GM Hellis sem fram fór 4. nóvember. Það voru níu keppendur sem mættu til leiks og tefldu allir við alla svo það voru 9v sem komu í hús hjá Elsu Maríu að skottu meðtalinni. Elsa María fer því með sinn fyrsta sigur á hraðkvöldi í vetur í farteskinu á EM landsliða sem hefst 8. nóvember.  Annar var Vignir Vatnar Stefánsson með 7v og síðan komu Hermann Ragnarsson, Ólafur Guðmarsson og Vigfús Ó. Vigfússson með 5,5v. Elsa María dró svo Björn Hólm í happdrættinu og fengu þau bæði gjafamiða á Saffran.

Næsta skákkvöld í Hellisheimilinu verður mánudaginn 11. nóvember kl. 19.30. Þá verður Atskákmót Reykjavíkur og Atskákmót GM Hellis.

Lokastaðan á hraðkvöldinu:

1.   Elsa María Kristínardóttir     9v/9

2.   Vignir Vatnar Stefánsson     7v

3.   Hermann Ragnarsson          5,5v

4.   Ólafur Guðmarsson              5,5v

5.   Vigfús Ó. Vigfússon              5,5v

6.    Björn Hólm Birkisson           3,5v

7.    Bárður Örn Birkisson           3,5v

8.    Björgvin Kristbergsson        3v

9.    Gunnar Nikulásson              2,5v

Mikhael og Egill efstir á æfingu

Mikhael Kravchuk sigraði með fullu húsi 5v í jafn mörgum skákum í eldri flokki á GM-Hellisæfingu sem fram fór þann 4. nóvember sl. Síðan komu margir jafnir með 3v en eftir mikinn stigaútreikning þá hlaut Oddur Þór Unnsteinsson annað sætið og Axel Óli Sigurjónsson það þriðja. Axel Óli virðist engu hafa gleymt þótt þetta sé fyrsta æfingin sem hann tekur þátt í á þessum vetri. 

 Í yngri flokki voru þrír efstir og jafnir með 6v af sjö mögulegum. Það voru Egill Úlfarsson, Ívar Andir Hannesson og Stefán Orri Davíðsson og það var meira að segja jafnt á stigum líka. Það var því gripið til þess ráðs að láta þá tefla um sætin þrjú sem gefa verðlaun. Þá varð Egill hlutskarpastur, Ívar Andri varð annar og Stefán Orri þriðji. 

Þátttakendur að þessu sinni voru: Mikhael Kravchuk, Oddur Unnsteinsson, Axel Óli Sigurjónsson, Birgir Ívarsson, Óskar Víkingur Davíðsson, Róbert Luu, Alec Elías Sigurðarson, Halldór Atli Kristjánsson, Heimir Páll Ragnarsson, Sindri Snær Kristófersson, Egill Úlfarsson, Ívar Andri Hannesson, Stefán Orri Davíðsson, Brynjar Haraldsson,  Sævar Breki Snorrason, Adam Ómarsson, og Aron Kristinn Jónsson.

Næsta æfing verður svo mánudaginn 11. nóvember nk. og hefst kl. 17.15. Stefnt er að því að skipta þá í tvo flokka eftir aldri og stigum. Æfingarnar eru haldnar í Álfabakka 14a í Mjóddinni, gengið inn á milli Subway og Föken Júlíu og salurinn er á þriðju hæð. Dæmatímar fyrir félagsmenn eru svo í gangi á laugadögum og styttist í að þar verði búið að klára eina umferð.

 

Hraðkvöld hjá GM Helli mánudaginn 4. nóvember

Skákfélagið GM Hellir heldur hraðkvöld mánudaginn 4. nóvember nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili GM Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Hilmir Freyr unglingameistari GM Hellis

Vignir Vatnar Stefánsson sigraði á jöfnu og skemmtilegu unglingameistaramóti GM Hellis sem lauk á þriðjudag. Vignir Vatnar fékk 6½ vinning í sjö skákum og það var Veronika Steinunn Magnúsdóttir sem náði jafntefli. Aðrar skákir vann Vignir Vatnar og gilti þá einu þótt hann stæði einhverju sinni höllum fæti um tíma; þá landaði hann sigri með keppnishörkunni og vann að lokum sanngjarnan sigur á mótinu.

Annar varð Hilmir Freyr Heimisson með 6 vinninga, sem er sami vinningafjöldi og dugði honum til sigurs í mótinu í fyrra. Hilmir Freyr, sem býr á Patreksfirði, gerði sér sérstaka ferð í bæinn til að taka þátt í mótinu og verja titilinn sem hann vann í fyrra. Það tókst, því Hilmir Freyr var efstur félagsmanna í GM Helli og er því unglingameistari félagsins. Þriðji varð Dawid Kolka með 5 vinninga. Hann vann mótið fyrir tveimur árum en var í skólaferðalagi í fyrra og átti þess ekki kost að verja titilinn þá. Núna vantaði herslumuninn til að ná lengra þótt vissulega hafi tækifæri boðist til þess í mótinu.

Vignir Vatnar og Hilmir Freyr voru einnig í tveimur efstu sætum í flokki 12 ára og yngri en þar náði Mikhael Kravchuk þriðja sætinu eftir mikinn stigaútreikning þar sem hann var hálfu stigi hærri en Óskar Víkingur Davíðsson í öðrum stigaútreikningi.

Næsti stórmeistari landsins, Hjörvar Steinn Grétarsson, heilsaði upp á keppendur í fimmtu og sjöttu umferð og tók við viðurkenningu frá félaginu. Hjörvar Steinn er líka sá sem oftast hefur orðið unglingameistari félagsins, fimm sinnum. Á þessu móti voru hins vegar keppendur sem eiga möguleika á að ná þeim árangri. Það fór síðan vel á því að Hjörvar Steinn léki fyrsta leiknum fyrir lærisvein sinn Vigni Vatnar í skák við Mikhael Kravchuk í 6. umferð. Sennilega er Hjörvar Steinn samt vanari því að aðrir fái það hlutverk að leika fyrsta leiknum fyrir hann.

Mótshaldið tókst vel og allir keppendur sem hófu mótið luku því, sem er ekki sjálfgefið í tveggja daga móti, með 20 mínútur í umhugsunartíma og marga unga þátttakendur. Allir stóðu þeir sig með prýði og tefldu af áhuga og þá ekki sísti yngstu keppendurnir Adam Omarsson sem er fæddur 2007 og Kristófer Jökull Jóhannsson sem er fæddur 2008.

Lokastaðan:

1. Vignir Vatnar Stefánsson                   6½ v./7

2. Hilmir Freyr Heimisson                       6 v.

3. Dawid Kolka                                       5 v.

4. Veronika Steinunn Magnúsdóttir       4½ v.

5. Birgir Ívarsson                                   4½ v.

6. Mikhael Kravchuk                              4 v. (24½; 28)

7. Óskar Víkingur Davíðsson                 4 v. (24½; 27½)

8. Alec Elías Sigurðarson                       4 v. (23; 26½)

9. Stefán Orri Davíðsson                       4 v. (23; 26)

10. Halldór Atli Kristjánsson                  4 v. (20)

11. Róbert Luu                                      4 v. (18)

12. Heimir Páll Ragnarsson                   3½ v.

13. Oddur Þór Unnsteinsson                 3 v.

14. Sindri Snær Kristófersson                3 v.

15. Óttar Örn Bergmann Sigfússon        3 v.

16. Ívar Andri Hannesson                      3 v.

17. Adam Omarsson                              3 v.

18. Brynjar Haraldsson                          2 v.

19. Egill Úlfarsson                                  2 v.

20. Kristófer Eggert Arnarson                2 v.

21. Kristófer Jökull Jóhannsson             1 v.

 

Myndir frá mótinu má finna hér.