Halldór Atli efstur á æfingu

Halldór Atli Kristjánsson sigraði með 6,5v á Hellisæfingu sem haldin var 30. september sl. Annar varð Róbert Luu með 5,5v og þriðji varð Sindri Snær Kristófersson með 5v eins og Egill Úlfarsson en Sindri Snær var hærri á stigum.

Í æfingunni tóku þátt: Halldór Atli Kristjánsson,  Róbert Luu, Sindri Snær Kristófersson, Egill Úlfarsson, Alec Sigurðarson, Stefán Orri Davíðsson, Brynjar Haraldsson, Ívar Andri Hannesson og Sævar Breki Snorrason.

Næsta æfing verður svo mánudaginn 7. október nk. og hefst kl. 17.15. Æfingarnar eru haldnar í Álfabakka 14a í Mjóddinni, gengið inn á milli Subway og Föken Júlíu og salurinn er á þriðju hæð.

Félagsfundur 6. október nk

Stjórn Hellis hefur samþykkt samrunasamning við Skákfélagið Goðann-Máta. Samningurinn er með fyrirvara um samþykki félagsfunda.

Félagsfundur Hellis þarf að samþykkja samrunan til að hann öðlist gildi. Í ljós þess boðar stjórn félagsins hér með til félagsfundar á skrifstofu Skáksambands Íslands sunnudaginn 6. október kl 16.

Dagskrá:

·         Staðfesting samrunasamnings Hellis og Goðans Máta.

·         Staðfesting á tillögum að samþykktum Skákfélagsins GM Hellis.

·         Staðfesting á starfsstjórn Skáksfélagsins GM Hellis.

·         Önnur mál löglega upp borin.

Samkvæmt samningnum renna Hellir og Goðinn Mátar saman í nýtt félag sem mun fá heitið „Skákfélagið GM Hellir“ sem stendur fyrir "Goðinn, Mátar og Hellir". Á næsta ári yrði tekin ákvörðun um endanlega nafngift félagsins.

Hið sameinaða félag verður starfrækt á tveimur svæðum, norðursvæði og suðursvæði. Á norðursvæði verða höfuðstöðvar GM Hellis í Þingeyjarsýslu og aðal stafsvettvangur Þingeyjarsýsla og nágrenni.  Á suðursvæði verða höfuðstöðvar félagsins í Reykjavík og aðal starfsvettvangur Reykjavík og nágrenni. Formaður GM Hellis verður Hermann Aðalsteinsson og varaformaður Vigfús Vigfússon. Aðrir í starfsstjórn félagsins fram að aðalfundi 2014 verða Andrea Margrét Gunnarsdóttir, Jóhanna Björg Jóhannsdóttir, Jón Þorvaldsson, Pálmi Ragnar Pétursson, Sigurbjörn Ásmundsson, Steinþór Baldursson og Magnús Teitsson

Meðal helstu markmiða með samrunanum eru:

Öflugt skákfélag

Nýja félagið verður eitt öflugasta skákfélag landsins þar sem jafnframt verður hlúð að ólíkum þörfum félagsmanna í skáklegu tilliti. Traustur bakgrunnur beggja félaga og augljós samlegðaráhrif, ásamt sterkum félagaskrám og góðum liðsanda, munu tryggja að þetta nái fram að ganga. Jafnframt er vilji til að félagið leggi sitt af mörkum til nýsköpunar og framþróunar í íslenskum skákheimi.

Efling ungmennastarfs

Með öflugu ungmennastarfi er lagður grunnur að framtíð félagsins. Gróskumikið ungmennastarf Hellis á suðursvæði sem á sér sterkt bakland í Breiðholtinu og víðar leggst vel að þessu markmiði. Ungmennastarfið á norðursvæði, sem þegar er komið á góðan rekspöl, mun einnig styrkjast. Aðilar stefna að því að tryggja öflugt ungmennastarf á báðum starfssvæðum, m.a. með samstarfi um kennslu og samnýtingu kennsluefnis en bæði félögin búa yfir mjög færum kennurum á þessu sviði. Með tengingu við öflugt starf á meistaraflokksstigi mun ungmennastarfið styrkjast enn frekar. Aðilar eru sammála um að stofna barna- og unglingaráð sem fær það hlutverk að annast útfærslu þessara markmiða.

Styrking afreks- og fullorðinsstarfs

Aðilar eru sammála um að auka enn frekar tækifæri fullorðinna félagsmanna til skákiðkunar og þátttöku í félagsstarfi. Hér gegnir lykilhlutverki sterkur grunnur GM varðandi utanumhald um skákiðkun á meistaraflokksstigi og þátttöku þeirra í mótum, þ.m.t. Íslandsmóti skákfélaga. Aðilar eru sammála um að koma á laggirnar meistaraflokksráði sem fær það hlutverk að annast útfærslu þessara markmiða.

Efling mótahalds

Aðilar eru sammála um að styrkja enn frekar mótahald á báðum starfssvæðum nýja félagsins. Verður þar m.a. unnið að því að standa fyrir alþjóðlegum mótum og fitja upp á fleiri nýjungum í mótahaldi, ásamt því að efla þau mót sem þegar eru á dagskrá, svo sem Framsýnarmótið, Gestamót GM, Meistaramót Hellis og Unglingameistaramót Hellis. Jafnframt stendur metnaður félagsins til að taka þátt í Evrópumóti taflfélaga. Áhersla verður lögð á að auka aðgengi ungmenna félagsins að heppilegum kappskákmótum. Aðilar eru sammála um að stofna sérstaka mótanefnd sem fær það hlutverk að annast útfærslu þessara markmiða.

Styrking félagstarfs

Aðilar eru sammála um að tryggja að félagsmönnum standi til boða aðgengi að fjölbreyttum tækifærum til að iðka skák, fræðast um hana í gegnum öflugt félagsstarf og taka framförum. Einnig er afar mikilvægt að eiga kost á því að njóta skemmtilegs samneytis í góðum hópi. Markmiðið er að með aðild að félaginu upplifi félagsmenn sig njóta forréttinda með þátttöku í starfseminni. Þannig verður hagur félagsins til langframa best tryggður.

Efling kvennastarfs

Sérstök áhersla verður á að byggja upp kvennaskák hjá félaginu og styðja viðhana. Hér skiptir miklu máli að kvennalið Hellis er þegar öflugt. Á þessu má því byggja - því er það markmið félagsins að laða stúlkur, bæði sunnan heiða og norðan, til þessarar skemmtilegu og þroskandi hugaríþróttar. Það er verðugt markmið að leiðrétta þá slagsíðu á þátttöku kynjanna í skák sem fyrir hendi er. Aðilar eru sammála um að stofna sérstakt kvennaskákráð sem fær það hlutverk að annast útfærslu þessara markmiða.

Með þessum samruna verður til öflugt skákfélag sem mun vinna að enn frekari útbreiðslu skáklistarinnar. Áhersla verður lögð á markvisst barna- og unglingastarf á skemmtilegum nótum ásamt því að slá öflugum ramma um skákiðkun fullorðinna, jafnt afreks- sem áhugamanna. Félagið mun leggja sig fram um að laða til leiks lítt virka skákunnendur af báðum kynjum og skapa aþeim aðstöðu til að njóta þess að tefla saman í góðum hópi. Byggt verður á sáttmála félaganna um gagnkvæma virðingu, góðan starfsanda og vilja til að ná árangri.

Goðinn-Mátar og Hellir sameinast

Stjórnir Skákfélagsins Goðans-Máta og Taflfélagsins Hellis hafa samþykkt að félögin snúi bökum saman og renni saman í eitt, með fyrirvara um samþykki félagsfunda. Hið sameinaða félag  nefnist GM-Hellir og verður starfrækt á tveimur svæðum, norðursvæði og suðursvæði. Á norðursvæði verða höfuðstöðvar GM Hellis í Þingeyjarsýslu og aðal stafsvettvangur Þingeyjarsýsla og nágrenni.  Á suðursvæði verða höfuðstöðvar félagsins í Reykjavík og aðal starfsvettvangur Reykjavík og nágrenni. Formaður félagsins verður Hermann Aðalsteinsson og varaformaður Vigfús Vigfússon.

 

Með þessum samruna verður til öflugt skákfélag sem mun vinna að enn frekari útbreiðslu skákiðkunar. Áhersla verður lögð á markvisst barna- og unglingastarf á skemmtilegum nótum ásamt því að móta öfluga umgjörð um skákiðkun fullorðinna, jafnt afreks- sem áhugamanna. Félagið mun leggja sig fram um að laða til leiks lítt virka skákunnendur af báðum kynjum og skapa þeim aðstöðu til að njóta þess að tefla saman í góðum hópi. Byggt verður á sáttmála félaganna um gagnkvæma virðingu, góðan starfsanda og vilja til að ná árangri.

 

Stjórnir félaganna hafa trú á því að sameiningin muni koma báðum skákfélögum og félagsmönnum þeirra til góða,  og að með þessu skapist tækifæri til að vinna sameiginlega að metnaðarfullum markmiðum  í þágu skáklistarinnar á Íslandi.

Gylfi og Vigfús efstir á hraðkvöldi

Gylfi Þórhallsson og Vigfús Ó. Vigfússon urðu efstir og jafnir með 6,5v í sjö skákum á hraðkvöldi Hellis sem haldið var 23. september. Þeir gerðu jafntefli í innbyrðis viðureign og unnu aðra andstæðinga. Þeir voru því einnig jafnir að stigum og þurfti að grípa til hlutkestis til að skera úr um sigurvegara. Þá hafði Gylfi betur með því að velja fiskinn. Jöfn í 3. og 4. sæti voru Vignir Vatnar Stefánsson og Elsa María Kristínardóttir með 4v. Í lokin dró svo Gylfi Gunnar Nikulásson í happdrættinu og fengu þeir báðir gjafamiða á Saffran.

Næsta skákkvöld í Hellisheimilinu verður mánudaginn 7. okóber kl. 20. Þá verður atkvöld.

Lokastaðan á hraðkvöldinu:

1.   Gylfi Þórhallsson                 6,5v/7

2.   Vigfús Ó. Vigfússon             6,5v

3.   Vignir Vatnar Stefánsson    4v

4.   Elsa María Kristínardóttir     4v

5.   Jón Úlfljótsson                     3,5v

6.    Gunnar Nikulásson             2,5v

7.    Pétur Jóhannesson             0,5v

8.    Björgvin Kristbergsson        0,5v

 

Dawid og Brynjar efstir á Hellisæfingu

Dawid Kolka sigraði með fullu húsi 5v í jafn mörgum skákum í efri flokki á Hellisæfingu sem haldin var 23. september sl. Annar varð Mikhael Kravchuk með 4v og þriðji varð Alec Elías Sigurðarson með 3,5v. Í yngri flokki sigraði Brynjar Haraldsson með 6v í sjö skákum. Annar varð Stefán Orri Davíðsson með 5v. Þriðji varð svo Róbert Luu með 4,5v.

Í æfingunni tóku þátt: Dawid Kolka, Mikhael Kravchuk, Alec Elías Sigurðarson, Felix Steinþórsson, Birgir Ívarsson, Óskar Víkingur Davíðsson, Halldór Atli Kristjánsson,Oddur Þór Unnsteinsson og Sindri Snær Kristófersson, Brynjar Haraldsson, Stefán Orri Davíðsson, Róbert Luu, Adam Omarsson, Ívar Andri Hannesson, Egill Úlfarsson og Ísak Máni Ágústsson.

Næsta æfing verður svo mánudaginn 30. september nk. og hefst kl. 17.15. Stefnt er að því að skipta þá í tvo flokka eftir aldri og stigum ef þátttaka leyfir. Æfingarnar eru haldnar í Álfabakka 14a í Mjóddinni, gengið inn á milli Subway og Föken Júlíu og salurinn er á þriðju hæð.