Góð þátttaka og árangur hjá Hellismönnum á Reykjavíkurskákmótinu

Einu af glæsilegri Reykjavíkurskákmótum er nýlokið. Mótið var það fjölmennasta sem haldið hefur verið, en alls tóku 227 skákmenn þátt í mótinu. Hellismenn létu sig ekki vanta á mótið en alls voru 21 félagsmenn í Helli sem tóku þátt í mótinu og eru þeir taldir upp hér að neðan í stigaröð. Þeir stóðu allir fyrir sínu þótt auðvitað gengi á ýmsu þegar svona stór hópur er að tafli. Einn af sigurvegurum mótsins var Egyptinn Amin Bassem en hann tefldi á 1. borði í a-sveit félagsins og fórst það ágætlaga úr hendi. Það gerir árangur hans ennþá athyglisverðari að daginn áður en hann lagði af stað til landsins lauk hann háskólaprófi í lyfjafræði og hafði því ekki mikinn tíma til að undirbúa sig fyrir mótið. Sennilega eru fáir stórmeistarar af hans styrkleika með háskólapróf í raungreinum. Hjörvar var í áfangasénsum í mótinu en seinni hluti mótsins tefldist þannig að hann þurfti að vinna David Navarra í lokaumferðinni sem gekk ekki eftir. Það var gaman að sjá Friðrik Örn Egilsson taka þátt í móti eftir áratugahlé. Síðustu árin hefur hann látið nægja 1-3 skákir á ári í Íslandsmóti skákfélaga þannig að þetta er mikil aukning hjá honum þetta árið. Af Hellismönnum þá voru 6 ennþá í grunnskóla og þrír á menntaskólaaldri og sumir að stíga sín fyrstu skref á alþjóðlegu móti. Það er auðvitað misjafnt hvernig menn lenda í baráttunni í neðri hlutanum og hvort menn nýta þau tækifæri sem gefast en hjá yngri skákmönnum félagsins fer mótið í reynslubankann og skilar sér síðar í aukinni getu ef þeir halda áfram að æfa sig vel.

• GM David Navarra 2710
• GM Ivan Sokolov 2644
• GM Amin Bassem 2631
• GM Yury Shulman 2563
• IM Hjörvar Steinn Grétarsson 2509
• WGM Lenka Ptachnikova 2269
• Bragi Halldórsson 2180
• Vigfús Vigfússon 1985
• Hallgerður Helga Þorsteinsdóttir 1960
• Óskar Maggason 1903
• Jóhanna Björg Jóhannsdóttir 1872
• Friðrik Örn Egilsson 1861
• Elsa María Kristínardóttir 1747
• Hilmir Freyr Heimisson 1693
• Dawid Kolka 1646
• Ingvar Egill Vignisson 1542
• Andri Steinn Hilmarsson 1500
• Felix Steinþórsson 1449
• Heimir Páll Ragnarsson 1354
• Óskar Víkingur Davíðsson 1017
• Alec Elías Sigurðarson 0